İşğal etilgen Qırımda Rusiyeniñ FSB hadimleri, qırımtatar milliy bayraqlarını taqip etip, qırımtatar halqınıñ sürgünlik qurbanlarınıñ Hatıra künü münasebetinen ötkerilgen matem merasimleriniñ iştirakçilerini tutalar. Bunı Qırım.Aqiqat Radiosınıñ aqşam efirinde Radio Svoboda jurnalisti Anton Naumlük haber etti.
«Aktsiyalar, resmiy olsa da, ğayrı resmiy olsa da, qırımtatar bayraqlarınen keçe, bayraqlarnı qırımtatarları tuta, ve aktsiya devamında kimse olarğa toqunmay bu bayraq sebebinden. Bunı siyasiy şiar kibi qabul etmeyler ve aktsiyalarnı qanunsız tanıtmaylar. Lâkin aktsiya yekünlengen soñ, aynı bayraq içün adamlarnı tutalar, olarnı memuriy qanun bozuvlarında ve ruhsetsiz kütleviy tedbirlerniñ keçirilmesinde qabaatlaylar. Adamlar sadece qırımtatar bayraqlarını tutıp, kelip çiçek qoyğanları içün, olarnı tutalar. Bu sebepten bügün bir-qaç onluq insan tutıldı», – dedi Naumlük.
Mayısnıñ 18-nde Aqmescitte qırımtatar bayrağını tutqan bir-qaç adamnı tuttılar.
Bundan ğayrı mayısnıñ 18-nde Bağçasarayda Rusiye politsiyası qırımtatar bayraqları pekitilgen beş maşnada ketken gençlerni tuttı, maşna aydavcılarına qarşı protokollar tizildi. Cuma künü, mayısnıñ 19-nda Bağçasarayda aydavcılarnı mahkeme etecekler.
Ukrainanıñ qıtaiy qısımında, işğal etilgen Qırımda, ve dünyanıñ çeşit memleketlerine mayısnıñ 18-nde qırımtatarlarnıñ sürgünlik qurbanlarını añuv Künü munasebetinen hatıra merasimleri teşkil etilecektir. Er sene bu künü 1944 senesiniñ faciası añıla, o vaqıt Qırımnıñ tamır halqı yarımdadan Orta Asiyağa sürgün etilgen edi. Cemi sayıda, 200 biñden ziyade adam sürgün etildi.
Ukrainada qırımtatarlarınıñ sürgüni genotsid dep tanıldı.
