Qırımtatar Meclisiniñ yolbaşçısı, Ukraina halq deputatı Refat Çubarov, Rusiye prezidenti Vladimir Putin qırımtatarlarına nisbeten özüni «Stalinniñ izdeşi» olaraq köstermekte, dep saya. Bu aqta o, 18 mayıs künü Ukraina Yuqarı Şurasında yapqan çıqışında söz yürsetti.
«Qırımnı tamır halqından azat etip, yarımadağa rusiyelilerni yerleştirmeknen bağlı manyakça arzusında Putin özüni, 18 mayıs 1944 senesi qırımtatar halqını öz tarihiy vatanından kütleviy sürette sürülmesine emir bergen Stalinniñ izdeşi olaraq köstere»,- dey Çubarov.
Onıñ aytqanına köre, Qırım zapt etilgenden soñ rusiyeli işğalçiler qırımtatar halqını öz tarihiy vatanından sıqıp çıqarmaq niyetinen maqsatkâr repressiya siyasetini amelge keçirmekte.
18 mayıs künü Ukrainada memorial tedbirlerniñ keçirilmesi planlaştırıla. Er yıl bu künü tamır halq 1944 senesi yarımadadan Orta Asiyağa sürülgeninen bağlı facialı vaqialar hatırlana. Episi olıp 180 bin insan sürülgen edi. Ukrainada qırımtatarlarınıñ sürgüni genotsid dep tanıldı.
