Rusiye Qırımnı işğal etken soñ qırımtatarlarnıñ tarihiy hatırasını silmege tırışa, dep saya Ukraina milliy mudafaa ve havfsızlıq hızmetiniñ (SNBO) kâtibiAleksandr Turçinov. Bunı o, mayısnıñ 18-de qırımtatar halqınıñ sürgüni munasebetinen beyan etti, dep bildire Ukraina SNBO idaresiniñ matbuat hızmeti.
«Putin idaresi altında bulunğan Rusiye yarımadanı zapt etip, qırımtatarlarnıñ milliy añını, tarühiy hatırasını, medeniy anane ve ğururını yoq etmege areket ete. Boysunmayuvnıñ bütün şekilleri ve işğalni qabul etmeyüv şiddetnen bastırıla, failler uydurılğan qabaatlavlarnen tutulıp apiske maküm etile», – dep qayd etti Turçinov.
Onıñ sözlerine köre, tamır halqnıñ takip etilüvi, rusiuyeliler tarafından Meclis faaliyetiniñ yasaqlanuvı, qorqu muitini meydanğa ketirüv, repressiyalar, yarımadanıñ arbiy bazağa çevirilüvi – işte bu, «Rusiye tarafından işğal etilgen Qırımdaki neticelerniñ tolu olmağan bir cedvelidir».
18 mayıs künü Ukrainada memorial tedbirlerniñ keçirilmesi planlaştırıla. Er yıl bu künü tamır halq 1944 senesi yarımadadan Orta Asiyağa sürülgeninen bağlı facialı vaqialar hatırlana. Episi olıp 180 bin insan sürülgen edi. Ukrainada qırımtatarlarınıñ sürgüni genotsid dep tanıldı.
