Link açıqlığı

Saatnıñ esas haberi

Qırımda «Çiygoz davası» boyunca mahkeme toplaşuvı lâğu etildi – Polozov


Qırım Yuqarı mahkemesiniñ binası, 18 mayıs 2017
Qırım Yuqarı mahkemesiniñ binası, 18 mayıs 2017

Mayısnıñ 18-de Kreml nezaretindeki Qırım Yuqarı mahkemesi «tehnikiy sebeplerden dolayı» qırımtatar halqı Meclisiniñ muavini Ahtem Çiygoz davası boyunca nevbetteki toplaşuvnı lâğu etti. Bu aqta öz Facebook saifesinde Nikolay Polozov bildirmekte.

«Şimdiçik Qırım Yuqarı mahkemesinden telefon ettiler. «Tehnikiy sebeplerden dolayı» bügün Ahtem Çiygoz davası boyunca toplaşuv yapılmaycaq eken», – dep yaza o.

Radio Svoboda muhbiriniñ haber etkenine köre, Yuqarı mahkeme binası yanında silâlı quvetlerniñ eki avtobusı bar.

Mayısnıñ 17-de keçken toplaşuvda qabaatlanğan tarafnıñ şaatı Rustem Mennanov aytqanına köre, 2014 senesi fevralniñ 26-da QMC Yuqarı Şurası ögündeki mitingte Ahtem Çiygoz «koridor açıp», Ukraina ve Rusiye tarafdarlarını biri-birine yaqınlaşmamasına çağırğan eken.

Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanıñ territorial bütünligine qoltutuv mitinginde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi. İşğal altındaki Qırımnıñ rusiyeli akimiyeti Çiygoznı kütleviy qalabalıqlar çıqarmasında qabaatlay.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG