Ukraina prezidenti Pötr Poroşenko Avropa parlamentiniñ prezidenti Antonio Tajaniden Rusiye işğal etken Qırım ve ukrain akimiyeti nezaret etip olamağan Donbass territoriyalarını, Avropa muessisesiniñ deputatları tarafından ziyaret etüvlerine musaade etmemesine çağırdı.
Körüşüvden soñ prezident Memuriyetiniñ matbuat hızmeti bildirgenine binaen, Poroşenko Avropa parlamentiniñ bazı azaları işğal etilgen Qırım ve Donbass territoriyalarını qanunsız ziyaret etkenlerini menfiy bir adım dep tanıdı.
Ukraina Tışqı işleri nazirligi daa evel beyan etkenine köre, istilâ altındaki Qırımğa barğan eyyetler ziyareti resmiy status taşımamaqtadır. Ukrain tış siayaset müessisesi çetel vatandaşlarınen oturma ruhseti olmağan şahıslarnı Qırımnı qanunsız şekilde ziyaret etmemeleri hususında tenbilegen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
