Türkiyeniñ bir-qaç şeerinde mayısnıñ 18-nde sürgünlikniñ 73-ci yıllığına bağışlandan tedbirler ötkerilecek. Bunı mayısnıñ 15-nde QHA haber ete.
«Yüregiñde ateş yaq» aktsiyası er sene dünyanıñ çeşit şeerlerinde ve Türkiyedeki qırımtatar qasabalarında ötkerile. Bu sene o «Edirneden Ardahanğa Qırım içün ışıq yaq» şiarınen keçirilecek», – dep haber etile.
Bu merasim çerçivesinde faaliyetçiler merkeziy meydanlarda yaqılğan çıraqlardan taraq-tamğanıñ şekilini tizeler, onı resimge çekip, resimni içtimaiy saytlarda paylaşalar.
«Bu kibi aktsiyalar şimdi daa emiyetlidir, çünki şimdi Qırım Rus işğalinde qalmaqta, onıñ tamır halqı ise basqılarğa oğray. Böyle aktsiyalarnıñ maqsadı – bügün qırımtatar halqınıñ ögüne çıqqan müşkülliklerni aşkâr etmek ve tarihınıñ facialı saifeleri aqqında hatırlatmaqtır», – dep yazıla bildirüvde.
Ukrainada mayısnıñ 18-nde qırımtatarlarnıñ sürgünlik qurbanlarını añuv Künü munasebetinen hatıra merasimleri teşkil etilecektir. Er sene bu künü 1944 senesiniñ faciası añıla, o vaqıt Qırımnıñ tamır halqı yarımdadan Orta Asiyağa sürgün etilgen edi. Cemi sayıda, 180 biñ adam sürgün etildi.
Ukrainada qırımtatarlarnıñ sürgünligi genotsid olaraq tanıldı.
Er sene Qırımda sürgünlik qurbanlarınıñ hatırasına matem merasimleri, Aqmescitniñ merkezinde matem mitingi ötkerile edi. 2014 senesi yarımada Rusiye tarafından zapt etilgeninden soñ bu kibi kütleviy tedbirler Qırımda yasaqlandı.
