Link açıqlığı

Ukraina informatsion siyaseti naziriniñ birinci muavini olğan Emine Ceppar Kyivde ötkerilgen Qırım Künlerinde yapqan çıqışında, üç yıl devamında Ukraina añlap, qırımtatar halqına nisbeten öz munasebetini deñiştirdi, dep ayttı.

«Keçken sene Jamala, bizim tarihımıznıñ facialı saifesi olğan qırımtatar halqınıñ sürgüni aqqında türkü yırlap ğalebe qazanğan edi. Jamala sayesinde, Ukrainada ve bütün dünyada yaşağan yüz-biñlerce insan asırlar boyunca bu topraqta öz aqqı içün küreşken bir halq olğanı aqqında eşitken edi. Soñki üç yıl devamında Ukraina añlap, bu halqqa nisbeten öz munasebetini deñiştirdi. Üç yıl içinde Qırım Ukraina aqqında hatırlavlarnı sıqıp çıqarmağa ve Qırımnı unutqanını isbat etmege areket etken repressiya ve qorqu yarımadasına çevirildi. Onıñ içün aytılğanlarnıñ yañlış olğanını kösterilmesi pek muimdir. Böyle bir tedbirlerniñ keçirilmesi, er şeyden evel Ukaraina, işğal etilgen Qırım içün küreşkenini aqqında Qırımğa yollanğan bir messagedir», – dep qayd etti Ceppar.

Mayısnıñ 1-14 arası Kyivdeki «Ukrinform», «Eurovision-2017» yır yarışına kelgen çetel jurnalistleri içün bir iş meydanına çevirildi. Teşkilâtçılarnıñ sözlerine köre, bu müddet içinde Ukraina informatsion siyaseti nazirligi volontör ve cemaatçılıq iştirakinen Ukrainanıñ dünyadaki imicini ileriletmek, tanıtuv ve ukrain etnik, tarihiy, ve medeniy qıymetlerini populârlaştırmaq maqsadınen tedbirler teşkil ete.

Qırımtatar asıllı ukrain yırcısı Jamala 2016 senesi İşviçrede «Eurovision»de ğalebe qazanğan edi. O, ğalebesini qırımtatar halqınıñ sürgünine bağışlanğan «1944» adlı türküni yırlap qazanğan edi. Ukrain yırcısınıñ ğalebesinden soñ, 2017 senesiniñ yarışı Kyivde ötkerildi.

XS
SM
MD
LG