Azerbaycan mahkemesi devlet akimiyetinden mustaqil olğan bir sıra saytnı qapatmağa qarar aldı. Bu sırada Radio Svobodanıñ Azerbaycandaki hızmeti – AzadlıqRadiosu saytı da bar.
Paytaht Bakunıñ Sabail rayon mahkemesi qarar alıp, Naqliyat, rabıta ve yüksek tehnologiyalar Nazirliginiñ iddia talabını qanaatlendirdi ve bu saytlarğa kirişni yasaqladı.
Böyle etip, azadliq.org saytı, "Azadlıq" gazetası ve "Meydan TV" saytları, ve daa eki telekanalnıñ saytlarına kiriş, mahkeme qararı ile sıñırlandı.
Nazirlik bu saytlarğa kirişni daa martnıñ 27-nde, Azerbaycan Baş Prokurorlığınıñ avalesinen sıñırlağan edi. Prokuratura bu saytlar memleketniñ milliy telükesizligi içün havflı olğanını aytqan edi.
Baş Prokurolıq olarnı «zorbalıqqa, nefretke ya da ekstremizmge çağıruv olaraq tanılğan malümatlarnıñ derc etilmesi, şahsiy ayatnıñ qoruma qaideleriniñ bozuvı ya da iftira atmaqta» qabaatlağan edi.
Bunıñ episi Azerbaycan prezidenti İlham Aliyevniñ aile azaları ve oña yaqın olğan şahıslarnen bağlı maliyeviy faaliyet aqqında bir sıra jurnalist taqiqatları AzadlıqRadiosu tarafından yayınlanğan soñ yüz berdi. Bu taqiqatlarnı jurnalistler Qabarcılıqqa ve müteşekkil cinayetçilikke qarşı jurnalistika leyhası (OCCRP) ile birlikte keçirgen ediler.
