İşğal etilgen yarımadada Kremlniñ nezaretinde çalışqan Qırım yolbaşçısı Sergey Aksönov mayısnıñ 12-nde iş ziyaretinen Keriçte oldı. O yerde El Tiygen (Geroyevskoye) qasabasında deñiz yalısını baqıp çıqqanda, çöplük qopqalarını körüp, açuvlandı, çünki olar Ukraina devlet bayrağınıñ renklerine boyalanğanlar. O sarı-mavı qopqalar içün yerli memurlanı para cezasınen qorquttı.
Ziyaretniñ video-parçalarını yerli kerch.fm agentligi yayınladı.
Aksönov: «Devletke qarşı kelgen renklerge boyalı çöplük qopqalarını kördiñizmi? Bu içün 5 mln. ruble (2,3 mln. grivna – QA) para cezası olmaq kerek. Çünki ekologiyanı bozalar ve ahlâqnı aqaretleyler», – dep çorlandı.
Kreml nezaretindeki Qırım parlamentiniñ yolbaşçısı Vladimir Konstantinov aprelniñ başında Aqmescitte «Mir Burger» fast-food yemekhanesiniñ açılışında «Ukrainanıñ qalımtılarını» yoq etmege talap etken edi. Bunen o, Qırım işğalinden soñ qapanğan, McDonald's restoranınıñ eski levhalarına qarşı çıqqan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
