Link açıqlığı

Qırımlılar sürgünlik qurbanlarınıñ hatırasına Çatır Dağğa köterildiler


Qırımda, Anğara boğazında mayısnıñ 13-nde, qırımtatarlarnıñ sürgünlik qurbanlarını añmaq maqsadınen, Qırımnıñ eñ yüksek dağlarından biri – Çatır Dağğa köterildiler.

Qırım.Aqiqat muhbiri bildire ki, sefer vaqıtında iştirakçilerden biri Jamalanıñ «1944» yırını yañğırattı, bu yır qırımtatar halqınıñ sürgüni aqqında tarif ete.

Türkiyeniñ paytahtı Ankara şeerinde mayısnıñ 13-nde cumaertesi künü qırımtatarlarnıñ sürgünlik qurbanlarını añuv Künü munasebetinen miting ötkerilecek. Merasimde Qırımtatar Milliy Meclis reisi Refat Çubarov ve Ukrainanıñ Türkiyedeki elçisi Andriy Sıbiga iştirak etecekler.

Ukrainada mayısnıñ 18-nde qırımtatarlarnıñ sürgünlik qurbanlarını añuv Künü munasebetinen hatıra merasimleri teşkil etilecektir. Er sene bu künü 1944 senesiniñ faciası añıla, o vaqıt Qırımnıñ tamır halqı yarımdadan Orta Asiyağa sürgün etilgen edi. Cemi sayıda, 180 biñ adam sürgün etildi. Ukrainada qırımtatarlarnıñ sürgünligi genotsid olaraq tanıldı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG