Link açıqlığı

QMC prokuraturası Qırım sakinleriniñ zorbalıqnen köçürilgeni aqqındaki işniñ taqiqatını devam ettire


Qırım Muhtar Cumhuriyeti prokuraturası işğal etilgen Qırım sakinleriniñ zorbalıqnen yarımada tışına köçürilüvinen bağlı cinaiy iş açıp, onıñ taqiqatını başlattı. Bu aqta Qırım.Aqiqat Radiosıefirinde Qırım Muhtar Cumhuriyetiniñ prokurorı Gündüz Mamedov bildirmekte.

«Biz Ukrainanıñ Cinaiy Kodeksi 438 maddesine binaen yarımadada yer alğan demografik vaziyetnen bağlı faktnı qayd ettirip, mahkemeden evel taqiqat reyestrine kirsettik. Öyle bir şartlar qoyulğan edi ki, kimligini coymamaq içün, bizm vatandaşlarımız köçmege mecbur qala ediler. İnsanlarnıñ ögüne qoyulğan şartlar bular edi: ya Rusiye Federatsiyasınıñ vatandaşı olasıñ, ya da Qırımda qalıp, bütün ictimaiy ve diger aqlardan marum olasıñ, işte, insanlar da mecbur Qırımnı terk ete ediler», – dep qayd etti Mamedov.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG