İşğal etilgen Qırımda mayısnıñ 14-nde ve 15-ne gece ava şaraitleri fenalaşacağı beklenile. Bunı Rusiye Fevqulâde vaziyetler nazirligi Qırımdaki idaresiniñ matbuat hızmeti haber etti.
Bildirüvde: «Qırım gidrometeorologiya ve etraftaki müitniñ nezaret idaresi, Qırımda bazı yerlerde küçlü yağmur, boran, burçaq, saniyede 17-22 metr suratınen küçlü yel esecegi beklenile», – dep aytıla.
Muessisede Qırım sakinlerini telükesizlik qaidelerine riayet etmege çağırdılar: pencerelerni qapatmaq, mümkün olğanı qadar tışarığa çıqmamaq. Bunen beraber soqaqlarda yürgende, elektrik ağlarından, büyük tereklerden uzaqça keçmege, olarnıñ yanında maşnalarnı qaldırmamaq kerekligi aqqında bildirile.
Mayısnıñ 9-da Qırımda acele surette furtunahavfı ilân etilgen edi. Bunıñ sebebi qasırğalı yel ve yağmurlar olğan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
