Ukrainada tışqı mustaqil imtianlarnı berecekler ekinci qoşma sessiyada qayd ola. İyül ayında imtian berecek olğanlar mayısnıñ 19-na qadar qayd olmalı. Bunı «Almenda» Vatandaş maarifi merkeziniñ mütehassısı Oleg Ohredko Qırım.Aqiqatqa bildirdi.
«Bu yıl keçken seneniñ tecribesi köz ögüne alındı, çünki qırımlılar içün ekinci sessiya acele teşkil etilgen edi. Ukraina akimiyeti qoşma sessiya yaptı, çünki Rusiyede, şu cümleden işğal etilgen Qırımda, ve Ukrainada imtian vaqıtları bir-birine teñ kele. Keder etmegen sessiya teşkil etildi», – dep hatırlattı ekspert.
2017 senesi ekinci qoşma sessiyada qayd oluv işleri planğa köre keçirile. Birinci sessiyağa vesiqalar endi berildi, lâkin qayd olğan qırımlılarnıñ sayısı daa belli degil, dep ayttı Öhredko.
Onıñ bildirgenine köre, tışqı mustaqil imtianlarnı berme esnası qırımlılar içün zor qala. Qırım abituriyentleri em ukrain, em rus mektep programmasına köre tasil almalı. Alternativ olaraq «Qırım – Ukrainadır» tasil merkezleri üzerinden Ukrainanıñ 12 aliy oquv yurtuna kirme imkânları bar.
