Kreml kontrol etken Qırım Yuqarı mahkemesi bağçasaraylı «Hizb ut-Tahrir davasınıñ» mabüsi Enver Mamutovnıñ şikâyet arizasını qanaatlendirmedi. Böylece, Aqmescitteki №1 SİZOda yatma müddeti iyülniñ 11-ne qadar devam etecektir. Bunı advokat Edem Semedlâyev mayısnıñ 11-nde Qırım.Aqiqatqa tarif etti.
«Kiyev mahkemesiniñ qararınen bağlı oturış oldı, şikâyet endi baqıldı, lâkin apiste yatma müddeti üç ayğa uzatılğan edi. Olar onı baqmağa mecbur ediler ve, elbet de, red ettiler. Oturış qapalı oldı, kimse içeri alınmadı: ne tuvğanları, ne dostları, ne yaqınları. Qadı diñleyici, jurnalist ve balalar mahkeme esnasına keder etecek dep, «buña endi alışmalısıñız ve böyle sualler bermemelisiñiz» dedi», – dep ayttı advokat.
Mayıs ayınıñ başında mahkeme «Hizb ut-Tahrir davası» çerçivesinde apiske alınğan dört bağçasaraylınıñ apiste yatma müddetini 2017 senesi iyülniñ 11-ne qadar uzattı.
Keçken sene mayısnıñ 12-nde Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
