Kreml kontrol etken Qırım Yuqarı mahkemesinde mayısnıñ 11-nde Çiygoz davası boyunca tanıqlıq etken eki şaat qabaatlanğan kişi 2014 senesi fevralniñ 26-nda Qırım Muhtar Cumhuriyeti Yuqarı Şurası ögünde olğan mitingde insanlarnı tınçlandırğanını körgenini bildirdi.
Bunı Ahtem Çiygoznıñ advokatı Nikolay Polozov Facebook saifesinde yazdı.
Advokatnıñ aytqanına köre, bugünki mahkemede üçünci şaat Emine Avamileva oldı. O, miting arfesinde olğan Qırımtatar Milliy Meclisiniñ toplaşuvı aqqında tarif etti. Şaat Ahtem Çiygozğa narazılıqlarnı teşkil etmege vazife berilmegen edi, dep qoştı.
Polozovnıñ bildirgenine köre, mahkeme işi yekünlengeni içün şaatnıñ sorğusı toqtatıldı. Nevbetteki oturış mayısnıñ 15-nde saat 9:30-da olacaqtır.
Ahtem Çiygoz 2015 senesi yanvar ayında 2014 senesi fevralnıñ 26-nda Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyülniñ 20-nde qapalı toplaşuvda «fevral 26 davasını» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
