Link açıqlığı

Saatnıñ esas haberi

«Qırım diversantları davasınıñ» mabüsi Suleymanovnıñ apis cezası avgustnıñ 9-na qadar uzatıldı


Redvan Suleymanov, arhiv fotoresimi
Redvan Suleymanov, arhiv fotoresimi

Kreml kontrol etken Aqmescitniñ Jeleznodorojnıy mahkemesinde mayısnıñ 11-nde Qırımdaki naqliyat yerlerine mayın qoyulğanına dair yañlış malümat bermesinde qabaatlanğan Redvan Suleymanovnıñ cinaiy işi boyunca daa bir oturış olıp keçti. Qadı Mihaylov imaye tarafınıñ itirazlarına baqmadan, Suleymanovnıñ apiste yatma müddetini avgustnıñ 9-na qadar uzattı. Bunı Qırım.Aqiqat mühbiri bildire.

«Ne taqiqat, ne qabaat tarafı Suleymanov saqlana, delillerni yoq ete ve mahkeme keçirilmesine keder ete bilecegini bir kere bile isbatlap olamadılar. Kiyev rayonı mahkemesiniñ biri-birine zıt kelgen eki qararı bar. Meni on künge apiske alğanda ertesi künü qadı daa bir qarar çıqardı, eski qarar işke tüşürilgenine baqmadan, Suleymanovnı apiste qaldırmaq muracaatını qanaatlendirmege qarar alındı», – dep izaatladı bugünki mahkeme qararını advokat Emil Kürbedinov.

Haber etilgeni kibi, «Qırım diversantları davasınıñ» mabüsi Redvan Suleymanov mahkemede qabaatını tanıdı, amma büyük zarar ketirgeninen bağlı qabaatına razı olmadı.

«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.

Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

XS
SM
MD
LG