Bügün de-bügün Ukrainanıñ Qırımda «qanunsız arheologlarğa» basqı yapabilecek bir vasıtası yoq ve olarnı yalıñız halqara sıñırlav yolunen toqtatmaq mumkün, dep saya Ukraina İlmler Milliy Akademiyası arheologiya İnstitutınıñ hadimi Vyaçeslav Baranov. Bu aqta o, Qırım.Aqiqat Radiosınıñ sabalıq efirinde söz yürsetti.
«Yalıñız kelecekte ğarp devletlerine kirişlerini qatiyen yasaq etmeli. Çünki bir çoq rusiyeli arheologlar hususan ğarptan grand almağa ve ğarp kütüphanelerinde çalışmağa pek avesler. Bu olarnı ayındırmaq içün tesirli olur edi. Bundan ğayrı ciddiy tesir etecek bir unsur yoq derecede», – dedi o.
2014 senesi martnıñ 16-da Qırım ve Aqyarda yarımadanıñ statusınen bağlıreferendum keçirildi, neticede Rusiye Qırımnı özüne qoşqanı aqqında ilân etti. Ukraina, Avropa birligi ve AQŞ bu rey berüvni tanımadılar ve bu, Qırımnıñ Rusiye tarafından işğal etilgeniniñ isbatıdır.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
