Link açıqlığı

Aqmescit sakini esas Ukrainağa sahte vesiqalar kösterip keçmege istegen – Ukraina Devlet sıñır hızmeti


Mayısnıñ 9 salı künü, Aqmescit sakini işğal etilgen Qırım memuriy sıñırı, «Kalançak» kiriş-çıqış kontrol noqtasından sahte vesiqalar kösterip keçmege istegen. Bu aqta mayısnıñ 10-da Ukraina Devlet sıñır hızmetiniñ matbuat hızmeti bildirmekte.

«Kontrol noqtasına qadar Aqmescit sakini olğan Ukraina vatandaşı «BMW» markalı maşnada kele ve vesiqaları teşkerilgen vaqıtta sıñırcılar, Ukraina vatandaşınıñ pasportını qısmen sahte olğanı ortağa çıqa. Ondan ğayrı, sıñırcılar teşkerüvni devam ettirgende, maşnanıñ resmiy qayıd şeadetnamesi de sahte olğanı belli ola», – denile haberde.

Sıñıcılar Milliy politsiyağa bildirip, Ukraina Cinaiy kodeksiniñ 358 maddesinde keçken «Vesiqa, müür, ştamp ve blank taqlidi, olarniñ satıluvı ve sahte vesiqa qullanıluvı»nen bağlı cinayeti yapılğan olması ihtimali aqqında malümat bereler.

Qırım 2014 senesiniñ başında Rusiye tarafından işğal etilgeninden soñ Ukrainanıñ esas qısmı ve yarımada arasında memuriy, lâkin aslında tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» olmaq üzre üç kiriş-çıqış kontrol noqtası çalışmaqta.

XS
SM
MD
LG