Link açıqlığı

Türk imamları Ramazan ayında Ukrainadaki qırımtatar cemaatlarını ziyaret etecek olalar


Türk imamları Ramazan ayındaki oraza maalinde esas Ukrainadaki qırımtatar cemaatlarını ziyaret etmek niyetindeler. Bu aqta Qırım.Aqiqatqa Ukraina musulmanları Birliginiñ yolbaşçısı, aynı zamanda esas Ukrainada ğayrıdan teşkil etilgen Qırım muftiyatı ülemalar (alimler) şurasını da yolbaşçılıq etken Suleyman (Elimdar) Hayrullayev ikâye etti.

«Bu Herson vilâyetinen, belki Lviv vilâyeti olur. Bu hususta Türkiyeni ziyaret etkende añlaşqan edik», - dey Hayrullayev.

Türk imamlarınıñ Ukrainağa kelecegi aqqında Qırım muftiyatı temsilcilerinen Türkiye diyanet işlerinen añlaşılğan edi, dep ilâve etti o.

2017 senesi (hicriy 1438 senesi) Ramazan ayı Mayısnıñ 26-da başlap iyünniñ 26-da bitecek.

2016 senesi noyabr ayında esas Ukrainadaki qırımtatar cemaatlarınıñ temsilcileri şimdilki zamanda Ukraina medeniyet nazirliginde qayd etilmekte olğan musulman diniy idaresi teşkil etken edi. Qırım musulmanları diniy idaresine Ayder Rustamov yolbaşçılıq yapmaqta.

XS
SM
MD
LG