Qırımnıñ Qapsihor (Morskoye) köyünde mayısnıñ 8-nde saba silâlı uquq qoruyıcılar qırımtatarlar toplu yaşağan rayonnı sarıp aldı. Bunı qırımtatar faili Lenora Dülber Facebookta bildirdi.
«Şimdi, Hapsihor köyüniñ (Morskoye) sakinleri bildirgenine köre, qırımtatarlar toplu yaşağan maalle silâlı insanlar tolu üç avtobusnen sarıp alındı, şimdilik bir şey yapmaylar, bundan evel bu avtobuslar Sudaq-Qapsihor yolunı qapattı, 20 daqqa devamında avtobuslar kirsetilmegen edi», – dep bildirdi Dülber.
Rusiye kontrol etken Qırımnıñ uquq qoruyıcıları şimdilik izaat bermey.
Bundan evel fail mayısnıñ 6-nda Qutlaq (Veseloye) ve Qapsihor (Morskoye) köylerinde qırımtatarlarnıñ evlerinde tintüv keçirilgenini bildirgen edi.
Rusiye Qırımnı işğal etken soñ yarımadada mustaqil jurnalistler, qırımtatar failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
