Sudaq rayonınıñ meclis reisi İlver Ametovnıñ evinde mayısnıñ 8-nde keçirilgen tintüv vaqtında uquq qoruyıcılar oğlunı köteklep, belli olmağan bir yerge alıp kettiler. Bunı İlver Ametov Qırım.Aqiqatqa bildirdi.
«Evimde etnografik müzey bar ve silâ çoq, orta asırlardan bugünge qadar bar. Müzeyde tintüv keçirdiler, er şeyni qaytardılar. Büyük oğlumnı köteklediler, qollarını baylap alıp kettiler, qayda – bilmeyim, aqşam telefon eteceklerini ayttılar», – dedi Ametov.
Mayısnıñ 8-nde saba Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebook saifesinde bildirdi ki, Sudaq rayonınıñ meclis reisi İlver Ametovnıñ evinde tintüv keçirile.
«Meclis azalarına qarşı yañı repressiyalar olğanı belli», – dep yazdı Smedlâyev.
2015 senesi dekabr ayında Rusiye uquq qoruyıcıları Sudaq rayonınıñ meclis reisi İlver Ametovnıñ evinde tintüv keçirgen edi.
Rusiye kontrol etken Qırım uquq qoruyıcıları tintüv ve tutuvlarnı şimdilik izaatlamay.
Rusiye Qırımnı işğal etken soñ yarımadada mustaqil jurnalistler, qırımtatar failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
