Moskva Ekinci dünya cenki ve 9 mayısnı tapınuvını öz propagandası oğrunda halqnı idare etmek içün qullana. Zemaneviy Rusiyeniñ ğururlanacaq iç bir şeyi olmağan soñ, o keçmişten bir manaçıq qıdırmağa mecbur qala. Bu fikirni Qırım.Aqiqatı Radiosınıñ sabalıq efirinde ukrain tarihçısı Vasiliy Pavlov beyan etti.
«Bu kerçekten de Rusiye Federatsiyasınıñ tarih saasındaki devlet siyasetidir. Rusiye tarihınen Sovetler Birligi tarihında zemaneviy Rusiyeniñ tarihiy siaysetinde, zemaneviy Rusiye siyasetiniñ halqara meydanında mifologemağa çevirilgen muayyen bir anları bardır. 9 mayıs ta işte böyle bir sakral künlerden biridir. Bu anlarnıñ epsini sovet, Rusiye insanlarınıñ özlerine has bir ğururı bar dep kösterecek olalar. Al-azırda ğururlanacaq bir an olmağanı içün, işte olar tüşüngeni kibi er kesni birleştirecek bir efsane yani «Büyük ğalebe» efsanesi saylâna», – dep eminliknen ayta Pavlov.
Rusiyede mayısnıñ 9 Qızıl ordunen sovet halqınıñ natsist Almaniya üzerinden qazanğan ğalebesi sebebinden ğalebe Künü bayramı olaraq qayd etile.
Mayısnıñ 8-de Ukraina hatıra ve uzlaşuv Künü, mayısnıñ 9-da ise, 1939-1945 yıllarda Ekinci dünya cenkine bağışlanğan natsizm üzerinden qazanılğan ğalebe Künü olaraq qayd ete. İşbu hatıra kününi 2015 senesi aprelniñ 9-da Ukraina Yuqarı Şurası kommunizmden qurtulma siyasetini uyğulamaq (dekommunizatsiya) maqsadınen saylâğan edi.
