Yaltada mayısnıñ 7-de ananeviy qırımtatar Hıdırlez bayramı qayd etilgen maalde «Villa Yelena» musafirhanesinde yanğın çıqtı.
Qırım KHV bildirgenine köre, yanğın tahminen saat 13.00 başlağan. Şeerniñ sailinde Hıdırlezni qayd etken insanlar, sana yerleşken yerge bir qaç yüz metr mesafede tuman çıqqanını köreler.
Yanğan musafirhaneniñ binası Rusiye MVDsi şeer idaresiniñ aman-aman qarşısında bulunmaqta, dep qayd etile haberde.
Al-azırda yanğın söndürüldi. Yanğın sebepleri ve zarar körgenler aqqında iç bir şey haber yoq.
Mayısnıñ 7-de Yalta şeeriniñ sailinde ananeviy qırımtatar Hıdırlez bayramına bağışlanğan konsert keçirildi.
Sanada oyun ve türkülernen yerli kollektivler çıqış yaptı, pavilyon içinde ise, ananeviy urbalarnı kiyilerek fotoresim çekilmesi teklif etile edi. Yaltalılar şiş kebap ve pilâvnen sıylandı.
Kreml nezareti altındaki akimiyet Qırımnıñ bazı şeerlerinde, Bağçasarayda mayısnıñ 6-da keçirilgen umumqırım bayramına baqmadan, ayrı bir bayram keçirmege musaade etmegen.
Hıdırlez – türkiy milletlerniñ eñ büyük bayramlarından biri olaraq, XIX asırda üç kün devamında qayd etilgen. Bayram Hıdır (al-Hidr) ve İlyas (İlya) yerde körüşken künü yani mayısnıñ 6-da qayd etilir. Merasimlerde qadimiy ayvanasravcılıq çizgileri körünmekte.
Qırım işğal etilgen soñ qırımtatar halqı Meclisiniñ temsilcileri Qırım Hıdırleziniñ qayd etüv merasiminde iştirak etmekni red etken ediler. Olar yarımadadaki öz semetdeşlerine de bu bayramnıñ qayd etüv merasimlerinde iştirak etmemelerine tevsiye etken edi.
