Link açıqlığı

Ukrainada Amet-Han Sultan añıldı


Kyivdeki Mustaqillik Meydanında (Maydan Nezalejnosti) birleşken milletler sırasında cenk etken ukrainlerge bağışlanğan sergi açıldı. Ekspozitsiya, Ekinci dünya cenkinde elâk olğanlar hatırlanğan vaqıttaki hatıra ve uzlaşuv Kününe bağışlana.

Sergi, aralarında qırımtatar uçucısı Amet-Han Sultan olğan 12 karamanğa bağışlana.

«As-uçucı. Şahsen 30 dane, ayrıca gruppa erkânında daa 19 duşman uçağı urıp tüşüre. Sovetler Birligi eki defa qaramanı. Ğururnen özüni qırımtatarı dep tanıta edi», - denile Amet-Han Sultan aqqındakimalümatta.

«Mayısnıñ 8-de keçirilgen hatıra ve uzlaşuv Kününe bağışlanğan merasimler zarfında, ukrainler natsistlerge qarşı – Qızıl ordu, Ukrain isyancılar ordusı, Poloniya ordusı, Fransız, Britaniya, Canada silâlı quvetleri ve AQŞ ordusı olmaq üzre – yedi ordunıñ saflarında hızmet etkenlerini hatırlaymız. Bugünden itibaren 12 qaramannıñ hatırasına Meydanda er biri içün – o zamanki cenkte er biriniñ ve er kesniñ qoşqan issesine bağışlanğan hatıra sergisi açıldı», – dep yaza Ukraina milliy hatıra institutı Facebookta.

Amet-Han Sultan 1920 senesi oktâbrniñ 20-de Alupkada dünyağa kele. Babası – lak milletinden (doğma Dağıstandaki Tsovkra-1 avulından), anası – qırımtatarı ola. Ana-babası tarafından Amet-Han Sultannı qırımtatarları da, Dağıstanlılar da öz milliy qaramanı dep qabul ete. Amet-Han Sultan 603 cenkâver uçuş yapıp, şahsen özü 30 ve grupp erkanında 19 lüftvaffeniñ (natsist Almaniyanıñ ava quvetleri – QA) uçağını urıp tüşüre. Uçuşlar yapqanvaqtında uçucı tahminen 100 uçaq çeşitini ögrene, uçuşları ise 4237 saatni teşkil ete. 1971 senesi fevralniñ 1-de Tu-16 uçma laboratoriyasında deñeme uçuşında elâk ola. Moskvadaki Novodeviçye mezarlığında defn etile. Dağıstannıñ paytahtı Mahaçkala şeerinde halqara avalimanına onıñ adı berilgen.

Mayısnıñ 8-de Ukrainada hatıra ve uzlaşuv Künü, mayısnıñ 9-da ise, Ekinci dünya cenkine bağışlanğan natsizm üzerinden qazanılğan Ğalebe künü qayd etile.

XS
SM
MD
LG