«Kyivo-Mogilânskaya akademiya» (Kyiv) neşriyatı Taras Çuhlibnıñ 1500-1700 yıllarda ukrain Getmanlığı ve Qırım hanlığı arasındaki munasebetlerge bağışlanğan tarihiy tedqiqat kitabını çıqardı. Bu aqta Qırım.Aqiqatqa Taras Çuhlib ikâye etip berdi. Onıñ sözlerine köre, kitapnıñ umumiy kölemi 500 nushadan ibaret ve ilk yüz nushası Kyivde mayıs ayında keçirilecek «Mıstetskıy Arsenal» adlı yedinci halqara kitap festivali arfesinde çıqacaq eken.
«İlk kiçik tanıtuvnı mayısnıñ 17-de başlanacaq «Mıstetskıy Arsenalda» keçirmege planlaştıram. Ondan soñ, belki, «E» kitap tükânında keçer», – dep ayta Çuhlib.
Onıñ qayd etkenine köre, kitapnı oquycaq olğan esas auditoriya alim, talebe ve ukrain tarinınen meraqlanğanlardan ibaret olur. «İlim basit tilnen yazılır, lâkin bu populirizatsiya degil, bu ilmiy monografiyadır», - dep ilâve ete muellif.
Aytqanına köre, monografiya Qırım hanlarınıñ ukrain getmenları ve poloniya qıralları arasındaki yazışmalar, ayrıca Varşava ve Moskva arhivlerinde saqlanğan o devirge ait devletler arasındaki anlaşmalarnen bağlı tedqiqatnıñ neticesi olğan. Çuhlib qayd etkenine köre, o tedqiq etken devirdeki Qırım hanlığı şarqiy Avropa devleti olğan.
«Qırım hanlığı, er kes tüşüngeni kibi, Osmanlı İmperatorlığınıñ yalıñız vassal ve Asiya devleti olmağan, o şarqiy Avropa devleti olaraq, bir çoq davalarda zayıf tarafqa qol tutip, vaziyetni balansta tutmağa areket etken», - dep qayd ete tarihçı.
Tarih ilimleri doktorı Taras Çuhlib Ukraina Miiliy ilimler akademiyası tarih institutınıñ ilmiy hadimidir. O, Qırım hanlığı ve Osmanlı İmperatorlığı devrine ait Ukraina-Osmanlı ve Ukraina-Qırım arasındaki munasebetlerge bağışlanğan bir qaç tedqiqat eseriniñ muellifidir.
