Link açıqlığı

Mayısnıñ 5-de Herson vilâyetiniñ Geniçesk rayonında «Qırımtatar masalları» kitabınıñ taqdimnamesi ve qırımtatar ustası Rustem Skibinniñ master-klassı ötkerildi. Bunı Qırım.Aqiqatnıñ muhbiri bildirmekte.

Tedbirler qırımtatarlarınıñ ekseriyet olıp yaşağan Novoalekseyevka ve Rıkovo qasabalarında keçirildi.

Ukrain tilinde çıqqan «Qırımtatar masalları» kitabını tanıtmaq içün «Veselka» bala edebiyatı milliy neşriyatı adına onıñ müdiri Aleksey Bondarenko keldi.

Tanıtuvlarnıñ ekisinde de bu kitapnıñ süslenmesinde qullanılğan örneklerniñ muellfi olğan qırımtatar ustası Rustem Skibinniñ çölmek ve fotoresim sergisi de teşkil etildi.

Usta Rustem Skibin qırımtatar masalları kitabınıñ taqdimnamesinde
Usta Rustem Skibin qırımtatar masalları kitabınıñ taqdimnamesinde

O, Novoalekseyevkadaki balalar içün qıırımtatar ornamentalistikası boyunca eki dane master-klass keçirdi. Rıkovo qasabasında ise, tanıtuv esanasında çölmeklerniñ süslenmesinen bağlı qırımtatar ananeleri boyunca lektsiya oqudı.

Qırım.Aqiqatqa bergen izaatında Rustem Skibin böyle tedbirlerniñ kerek olğanını qayd eterek, olar vastasınen çeşit halqlar biri-biriniñ medeniyetini tanımağa fursat qazanacaqlarına diqqat çekti.

«Avası deñiz qoquy, semetdeşlerimiz çoq, tolusınen evde –Qırımda olğanımnı is ettim», - dep qıymet kesti Geniçesk rayonını ziyaret etken qırımtatar ustası.

«Qırımtatar masalları» kitabınıñ taqdimnamesinde milliy çölmekçilik nümüneleri
«Qırımtatar masalları» kitabınıñ taqdimnamesinde milliy çölmekçilik nümüneleri

Kitap tanıtuvı ve master-klasslar mayısnıñ 6-sı cumaertesi künü Hıdırlez bayramı çerçivesinde de ötkerilecek.

Daa evel haber etilgeni kibi, Qırım sıñırında yerleşken Herson vilâyeti Geniçesk rayonında mayısnıñ 6-da qırımtatar Hıdırlez bayramı qayd etilecek.

Sçastlivtsovo bala eglence parkında kündüz bayram tedbirleri başlanıp, qırımtatar kureşi boyunca yarış, ziyafet, daa keççe qırımtatar taqımlarınıñ kontserti ötkerilecek.

Herson vilâyeti Qırım yarımadasınen qomşudır. Herson vilâyetiniñ Geniçesk rayonı qırımtatarlarınıñ Ukraina ana toprağında eñ sıq yaşağan yerleri dep esaplana.

XS
SM
MD
LG