Link açıqlığı

Qırım yanında Rusiye gemisi Ukraina katerini elge keçirmege tırışqan – Ukraina infrastruktura nazirligi


Skadovsk civarlarında Ukraina Deñiz qıdıruv-qurtaruv hızmeti qurtarıcıları Qara deñizde muntazam talimler keçirgen vaqıtta Rusiye gemisi Ukraina qurtarıcı katerini elge keçirmege areket etken. Adise aprelniñ 24-de yüz bergeni aqqında Ukraina infrastukturası nazirliginiñ matbuat hızmeti bildirmekte.

«Rusiye tarafından işğal etilgen Qırım yarımadasında yerleşken Rusiye gemileri Ukraina qurtarıcı katerine yaqınlaşıp, efirge vastasınen «gemi areketini toqtatıp, dreyfke keçmesini» talap etken», - dep bildirilmekte.

İdare hadimleri ikâye etkenine köre, Ukraina qurtarıcı kateri Ukraina territorial suvlarında bulunğanını qayd eterek, qanunsız talaplarğa riayet etmekni red etken ve Skadovskqa doğru areket etip başlağan.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG