Link açıqlığı

Ketken sayın rusiyelilerniñ ekseriyeti tatillerini işğal etilgen Qırımda keçirmek yerine Bulğaristan ya da Türkiyede raatlanmaqnı daa da uyğun dep köreler. Bu aqta mayısnıñ 4-de Qırım.Aqiqat Radiosı efirinde Ukraina turizm inkişaf ettirüv merkeziniñ müdiri Vladimir Tsaruk ikâye etmekte.

«Bugünki künde rusiyelilerniñ adet-üzre ziyaret etken yerleri – Türkiye ve Bulğaristandır. Eger Bulğaristan fiyatlarını pek artırmayıp, asğariy yükseliş kösterse, Türkiyeniñ fiyatları bu sezonda keçken senege nisbeten daa da paalılaşacaq, çünki rusiyeliler bu yıl Türkiyege uçmağa fursatları bar. Bu mesele fiyatlarnıñ şekillenmesine de tesir etecek... Qırım, hususan rusiyeliler arasında pek meşur edi, çünki Ukraina fiyatları Rusiyeniñ Krasnodar vilâyetinen qıyaslanğanda, bayağı farq ete edi. Bugün de-bugün Krasnodar vilâyeti ve Qırım arasında fiyat farqı ep eksilmekte, çünki infrastruktura ve servis seviyesi alçaq olğanı sebebinden, Türkiye bir çette tursın, Bulğaristannen bile reqabet etip olamay. Bu ise, Qırım reqabet etip olamamasınıñ eñ esas bir unsurıdır», - dep qayd ete Tsaruk.

Ukraina Devlet Sıñır Hızmetiniñ malümatlarına köre, 2017 senesiniñ ilk üç ayı zarfında Qırım memuriy sıñırından keçken vatandaşlarnıñ sayısı 24%, transport vastalarınıñ sayısı ise eki qat eksilgen. Statistika yarımadağa kirgen ve çıqqanlarnı esapqa almaqta. Muessise fevral ayında da Qırım kiriş noqtalarındaki yolcu sayısı eksilgenini bildirgen edi.

XS
SM
MD
LG