Link açıqlığı

Aqmescitte faalci tintüvden soñ «E Merkezine» alıp ketirildi – advokat


Qırımlı vatandaş faalcisi Tofik Abdulgaziyevni mayısnıñ 4-nde evinde keçirilgen tintüvden soñ Rusiye uquq qoruyıcıları Aqmescitteki Ekstremizm ile küreş merkezine yolladılar. Bunı advokat Emil Kürbedinov Qırım.Aqiqatqa bildirdi.

«Onı Ekstremizm ile küreş merkezine alıp kettiler, sorğuğa. Bu organ soñki aylarda onlarnen memuriy protokollar tizgen, insanlarnı üç künden 12-15 künge qadar apiske alğan ediler. Tofik Abdulgaziyev – çette qalmayıp, er tintüvge kelgen birisidir. Apiske alınğanlar azat etilgende kele edi, olarnı qarşılay edi», – dep tarif etti Kürbedinov.

Advokatnıñ malümatına köre, Tofik Abdulgaziyevniñ evinde tintüv keçilgende bir şey alınmadı. Diger advokat Edem Semedlâyev «E Merkezine» barğan soñ dedi ki, Tofik Abdulgaziyev parmaq izlerini bermege ve foto çıqarmağa razı olmadı, bir de bir malümat bermedi.

«Añlağanıma köre, 2016 senesi iyün ayında qırımtatarı Enver Memetov ğayıp olğanından açılğan cinaiy iş çerçivesinde tintüv keçirildi. Sualler umumiy edi: angi dinni kütesiñiz, angi camige barasıñız. Cedvelni kördim, anda çoq sual bar edi, bu sebepten bizler 51-inci madde (Rusiye Anayasası – QA) boyunca malümat bermekten vazgeçtik, çünki bular ne yerge qoşulacağını bilmeymiz», – dep añlattı advokat.

Rusiye uquq qoruyıcıları yapacaq areketlerini aydınlatmay.

Mayısnıñ 4-nde saba Aqmescitte qırımlı Tofik Abdulgaziyevniñ evinde tintüv olıp keçti. Faalci bildirdi ki, uquq qoruyıcılar evinde ğayıp olğan insannıñ vesiqalarını qıdıra ediler.

Qırım işğalinden soñ yarımadada mustaqil jurnalistler, qırımtatar failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, Meclis azalarınıñ evlerinde tintüvler sıqlaştı.

Ukraina Tışqı işler nazirligi Ukraina vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

XS
SM
MD
LG