Link açıqlığı

Kreml kontrol etken Qırım Yuqarı mahkemesinde Qırımtatar Milliy Meclisiniñ reis muavini İlmi Ümerovnıñ mahkeme yerinden berilgen şikâyet arizasını baqacaq olalar.

«Mayısnıñ 4-nde saat 13.30-da Yuqarı mahkemede (Pavlenko soq., 2) cinaiy işim boyunca mahkeme oturışı keçirilecek yerden advokatlar bergen şikâyet arizaları baqılacaq. Bağçasaray rayon mahkemesi mahkemecilerniñ «menfaatları ola bile» dep, menden vazgeçti, çünki men uzun bir müddet devamında rayon yolbaşçısı edim», – dep yazdı Ümerov Facebook saifesinde.

Kreml kontrol etken Qırım prokuraturasında martnıñ 21-nde Qırımtatar Milliy Meclisiniñ reis muavini İlmi Ümerovğa cinaiy iş boyunca qabaat qararı berildi.

İlmi Umerovnıñ qızı Ayşe 2016 senesi dekabrniñ 30-nda bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826.

Dekabrniñ 29-nda İlmi Ümerov Qırım mahkemesiniñ Qırımtatar Milliy Meclisiniñ toplaşuvında iştirak etkeninden bergen para cezasını ödep olamadı.

İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.

Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

Meclis reisi Refat Çubarov İlmi Ümerovnıñ taqip etilmesini Rusiye işğal etken Qırımda qırımtatarlarğa qarşı basqı kampaniyasınıñ bir qısmı olğanını saya. «İşğal vaziyetinde qırımtatarlar köstergen cesaret ve sebatı, halqı, toprağı ve ecdatlarınıñ dini – İslâmğa sadıqlığı halqara toplulıq tarafından qayd etildi ve qırımtatar halqının bahtlı keleceginiñ temeli ola», – dep ayttı Çubarov.

XS
SM
MD
LG