Kreml nezareti altındaki Aqmescit şeeriniñ memuriyeti yayma satışnı yasaqlağan qarar qabul etti. Mütenasip vesiqa şeer memuriyetiniñ saifesinde derc etilgendir.
«Yayma satış yasaq etilgen zonalarğa Puşkina, K.Marksa, Gorkigo, A.Nevskigo, Serova soqaqları ve Kirov prospekti kirmekte«, - dep yazıla vesiqada.
Aynı zamanda, seyar satış yerleri olaraq Kubanskaya soqağı, 26 (ziraat mahsulatları satış noqtası olaraq), Komsomolskoye qasabasında Sovetskaya soqağındaki 31-nci evniñ ögü (ziraat mahsulatları satış noqtası olaraq) ve Agrarnoye qasabasında Parkovaya soqağındaki 6-ncı evniñ yanı (ziraat mahsulatları satış noqtası olaraq) tayin etilmektedir.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
