Aqmescitte mayıs 4 künü Qırım sakini Tofik Abdulgaziyevniñ evinde tintüv ötkerildi. Bunı öz Facebook saifesinde Qırımtatar Milliy Qurultaynıñ MSK reisi Zair Smedlâyev haber etti.
«Kene de tintüvler! Simdi Marşal Jukov rayonında, Tofik Abdulgaziyevniñ evinde. Camilerni, mezarlıqlarnı aqaretleyler, Quranlarnı yırtalar, qırımtatarlarnı taqip eteler ve tinteler – kim keyflenip, raat yaşayış süre», – dep yazdı Smedlâyev.
Tofik Abdulgaziyevniñ özü tintüvden soñ, video vastasınen bergen izaatında bildirdi ki, silâlı hızmet vekilleri onıñ evinde bir ğayıp olğan adamnıñ vesiqalarını qıdıra ekenler.
«Bu adamnen iç bir şekilde bağlı degilim. Olar iç bir şey tapamadılar. Kompyüter ve telefonlarımı tutıp almadılar. Özleri nezaketnen davrandılar, ayaqlarına bahil kiyip içerge kirdiler», – dep qayd etti tintilgen evniñ sakini.
İşbu video-izaatnı Facebookta qırımlı fail Remzi Bekirov yerleştirdi.
Rus silâlı hızmetleriniñ izaatları şimdige qadar yayınlanmadı.
Qırım işğalinden soñ yarımadada mustaqil jurnalistler, qırımtatar failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, Meclis azalarınıñ evlerinde tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
