Link açıqlığı

Qırımda bir yıl içinde bala bağçalarında 9 biñ yer açmağa niyetleneler


Rusiye Devlet dumasınıñ deputatı Konstantin Baharev 2017 senesi Qırımdaki bala bağçalarında 9 biñ yañı yer açılacağını aydınlattı. Bunı Kafanews neşiri haber ete.

«Bu sene Federal programma çerçivesinde statsionar bala bağçaları peyda olacaq. Modul bala bağçaları – pek güzel şey... Lâkin anda balalarnıñ sayısı 120-den ziyade olmay. Federal programma çerçivesinde statsionar bala bağçalarını quramız, anda, Sovetler Birliginde olğanı kibi, 300-350 bala qatnaycaq, bu daa da güzel», – dep qayd etti Baharev.

Onıñ bildirgenine köre, «Qırımda bala bağçalarında nevbet meselesi vatandaşlarnıñ içtimaiy qoruma, sağlıq ve mesken-kommunal hocalığı saalarındaki problemler ile aynı sırada qala».

«Bir çoq vatandaş elektron sıra almadı. Şu sebepten nevbette turğanlarnıñ sayısı eksile, lâkin istegenimiz kibi tez degil, çünki qayd olmağanlar qoşulmağa başlay», – dedi Baharev.

Yedinci çağırılış Devlet dumasınıñ saylavları 2016 senesi sentâbrniñ 18-nde Rusiye ve işğal etilgen Qırımda olıp keçti. Ukraina ve Ğarpnıñ bir sıra memleketi olarnı tenqit etti. ABD, Kanada, Frenkistan, İsveç, Büyük Britaniya, Almaniya, Çeh Cumhuriyeti, Türkiye işğal altındaki Qırımda keçirilgen saylavlarnı tanımadılar. Poloniya Tışqı işler nazirligi Rusiye Devlet dumasınıñ saylavlarını umumen qanunğa uyğun olğanını şübege oğrattı. Ukraina Yuqarı Radası sentâbrniñ 20-nde işğal etilgen Qırımda olıp keçken saylavlarnı ve Rusiye Devlet dumasınıñ yedinci çağırılış erkânını qanunsız dep tanıdı.

Qırımdaki bala bağçalarında 20 biñ bala nevbette tura. Qırımnıñ Rusiye ükümeti Aqmescitte 18 bala bağçası qurulacağını vade etti.

Qırımdaki bala bağçalarında olğan nevbetlerniñ artması Rusiyeden Qırımğa çalışmağa kelgen memurlarnıñ çoqlaşmasınen bağlıdır.

XS
SM
MD
LG