Mayıs ayınıñ 6-sı ve 7-nde Kyivdeki «Eurovision-2017» yır yarışı çerçivesinde Qırım Künleri keçirilecektir. Qırımtatar siyasetçi, oyuncı, çalğıcı, ressam ve yırcıları paytahtnıñ sakinleri ve musafirlerini yarımada keçmişi ve kelecegine dalmağa davet eteler. Bunı merasim teşkilâtçıları Facebookta ilân etti.
«Siz Kyivniñ merkezinde qalsañız da, renkli tedbirler sizni Qırımğa alıp keter. Qırım yarımadasınıñ tamır halqınıñ vatanına barmağa acet olmaycaq», – dep tarif ete teşkilâtçılar.
Qırımtatar asıllı ukrain yırcısı Jamala 2016 senesi İsveçte «Eurovision» yarışında ğalebe qazandı. O, qırımtatar sürgünligini añlatqan «1944» yırınen çıqışta bulundı. 2017 senesi yarış Kyivde ötkerilecektir.
«Eurovision-2017» yarışınıñ yarım finalları Kyivde mayısnıñ 9 ve 11-nde olacaq, finalı – mayısnıñ 13-nde. Ukrainanı bu sene O.Torvald taqımı Time yırınen temsil etecek.
Yarışta 43 memleketniñ vekilleri iştirak etecektir.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
