Mayısnıñ 1, bazaertesi künü Aqyarnıñ “Lukomorye” bala eglence parkında milliy yemekler festivali keçti. Bunı Qırım.Aqiqatınıñ korrespondenti bildirmekte.
Aqyar ve Aqmescitten kelgen yigirmige yaqın milliy-medeniy cemiyet ve teşebbüsçi gruppa park ziyaretçilerini öz halqlarınıñ milliy yemeklerinen tanıştırdı: ukrain cemiyeti borşç, pompuika ve korovay, beyaz ruslar draniki, qazan tatarları –çak-çak ve çırlama, tacikler –pilâv, dağıstanlılar- şiş kebap pişirdi.
Parknıñ ziyaretçileri onıñ merkezinde keçirilgen viktorinanıñ suallerine doğru cevap bergen taqdirde lukamorçik talonları alaraq çeşit halqlarnıñ milliy yemeklerni bedava aşap baqmağa fursat qazana ediler.
Toplanğanlar ögünde bir qaç milliy teşebbüskâr ansambl çıqış yaparaq, ana tilinde türkü yırlap, öz halqlarınıñ milliy oyunlarnı icra ettiler.
“Aqyar ukrain milliy-medeniy cemiyeti” cemaat teşkilâtınıñ failleri (UNKOS) “Çervona ruta” adlı meşur türküni icra ettiler.
Qırım.Aqiqatına berilgen izaatında UNKOS failleri festival esnasında özleri pişirgen 600 çanaq borşç dağıtqanları aqqında ayttılar.
Festivalni ayrıca Kreml nezaretindeki vaqtınca Aqyar gubernatorı vazifesini eda etken Dmitriy Ovsyannikov reberligi altındaki bir gruppa yerli memur da ziyaret etti.
