2017 senesi Aqyar yollarınıñ tamirlenmesi içün qararnen 1,7 milliard ruble (30 million dollar civarında) ayırılacaq. Bu aqta aprelniñ 30-da Kreml nezareti altındaki vaqtınca Aqyar gubernatorı vazifesini eda etken Dmitri Ovsyannikov ayttı, dep bildire TASS.
«Üç yıldan berli yol tamirlenmesine ayırılğan paralarnıñ miqdarı ep arttırılmaqta. 2015 senesi - 300 million, keçken sene – 1,3 milliard ayırılğan olsa, bu yıl 1,7 millard ayırılacaq. Ayırılğan para tamir ve kapital tamir içün qullanılacaq», -dep ayttı Ovsyannikov.
Onıñ sözlerine köre, bu yıl 28 km yol kapital tamir etilecek eken.
«Men yoldaki çuqurlarnıñ tamirlenüvini közde tutmayım, çünkü paralar bütünley yollarnıñ kapital tamirine işletilecek yani yolnıñ belli bir tabaqası kesilip alınacaq ve büyük “parçalar” şeklinde tamir etilecek», dep ilâve etti Ovsyannikov.
Mart ayınıñ başında Aqyar-Aqmescit yolunuıñ bir qısmı çökken edi. Aqtar şeer idaresi şeerde fevqulâde vaziyet ilân eterek, maşna, avtobus ve yük maşnaları aylânıp ketecek başqa yol köstergen edi.
Çökken Aqyar-Aqmescit yolunıñ bir qısmını tamirlemek içün o zaman 70 million ruble (33 mln grn ziyade QA) ayırılğan edi. İşni yapacaq teşkilâtnen tizilgen anlaşma 25 million ruble (11 mln 900 bşñ grn –QA) tutqan edi. Bunı Kreml nezareti altındaki Aqyar yolbaşçısı Dmitri Ovsyannikov bildirdi.
