Pariste UNESCO İcra Şurasınıñ programma ve tışqı alâqaar Komitetiniñ 201-ci toplaşuvında «Qırım Muhtar Cumhuriyetinde (Ukrainada) vaziyetniñ taqip etilmesi» aqqında qarar qabul etildi. Bunı Ukraina Tışqı işler nazirliginiñ matbuat hızmeti bildirdi.
«Yarımada Rusiye Federatsiyası tarafından işğal etilgen soñ biri biri atrından endi yedinci kere Qırım meselesine dair İcra Şurasınıñ qararı qabul etile ve QMC ile Aqyar şeerinde UNESCO mesüliyetindeki saalada taqipniñ devam ettirilmesi ve Teşkilâtnıñ reisi tarafından mütenasip maruzanıñ azırlanılması ve oktâbr ayında İcra Şurasınıñ toplaşuvında taqdim etilmesi buyurılmaqta», – dep aytıla TİN bildirüvinde.
Tışqı işler nazirliginiñ malümatına köre, keçken 200-ci toplaşuvdan soñ Ukraina ve UNESCO Kâtibiyeti birlikte Qırımdaki vaziyetniñ UNESCO tarafından nezaret etilmesini başlattı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
