Link açıqlığı

Qırımnıñ memuriy sıñırında Rus sıñırcıları naqliyat areketini toqtatalar – Ukraina Devlet sıñır hızmeti


«Çonğar» keçit noqtası – avtomobil nevbeti, 29 aprel 2017 senesi

Aprelniñ 29, Salı künü Qırımnıñ memuriy sıñırında «Armânsk» keçit noqtasında Rus sıñırcıları naqliyat areketini kestiler. Bunı Qırım.Aqiqatqa Herson sıñır bekçileri bölüginiñ reberi İvan Şevtsov bildirdi.

«Saat 9:40 işğalciler keçitni qapattılar. Nevbetler şimdilik yoq», – dedi o.

Qırım.Aqiqat muhbiri bildire ki, Rusiye sıñırcıları areketni toqtaqanları sebebinden memuriy sıñırda vaziyet bir-qaç kere deñişip turdı.

Saba «Çaplınka» keçit noqtası Rusiye tarafından blok etilgeni sebebinden o yerde nevbetler tizilecegi beklenile edi. Lâkin bir-az soñra «Armânsk» kiriş-çıqış noqtasında nezaret işleri devam ettirilgen soñ vaziyet tüzeldi.

Aynı zamanda ukrain tarafında «Çonğar» keçitinde Qırımğa yol tutqan 300 maşna nevbetke tizildi.

«Çonğar» keçit noqtası – avtomobil nevbeti, 29 aprel 2017 senesi
«Çonğar» keçit noqtası – avtomobil nevbeti, 29 aprel 2017 senesi

«Kalançak» keçit noqtası işini adiy surette devam etmekte.

Ukraina Devlet sıñır hızmeti, endi dört kün devamında Rusiye nezaretinde Qırımda çalışqan müessiseler yarımadağa kirmege istegen vatandaşlarğa oñaytsızlıqlar yapqanını beyan ete.

Rusiye sıñırcılarınıñ resmiy izaatları şimdige qadar seslendirilmedi.

Rusiye nezaretindeki Qırım Gümrük hızmeti, Herson vilâyetinen memuriy sıñırdaki yollarda er angi zotluqlar olmağanını deyler ve yollar açıq olğanını beyan eteler.

Qırım 2014 senesiniñ başında Rusiye tarafından işğal etilgen soñ Ukainanıñ qıtaiy qısımı ve yarımda arasında asılında memuriy, lâkin fakt olaraq kerçek «sıñır» keçirildi. Memuriy sıñırda «Kalançak», «Çongar» ve «Çaplınka» kiriş-çıqış kontrol noqtaları çalışmaqta.

XS
SM
MD
LG