Link açıqlığı

Saatnıñ esas haberi

PACE deklaratsiyası qırımtatarlarınıñ aqlarını diqqatlıca qorçalamağa imkân doğuracaq – Logvinskiy


Aprelniñ 26-nda Rusiyeden BMT Halqara mahkemesiniñ tevsiyelerini yerine ketirilmesini talap etken PACEniñ deklaratsiyası Meclisnen qırımtatarlar halqınıñ aqlarını diqqatlıca qorçalamağa imkân doğuracaqtır. Bu aqta Ukraina halq deputatı, Ukraina Yuqarı Şurasınıñ Avrupa Şurası Parlament Assambleyasındaki daimiy eyyeti reisiniñ muavini Georgiy Logvinskiy arpelniñ 27-nde Qırım.Aqiqatına bergen izaatında söz yürsetti.

«Bu Avrupa Şurasınıñ resmiy bir vesiqası ve teptipke binaen muayen devletlerniñ temsilcisi olğan muayen sayıdaki deputat tarafından imzalanması şart. İşbu vesiqa Rusiye Federatsiyası ve Meclis arasındaki bütün diplomatik munasebetlernen alâqalı. Ondan da ğayrı, onıñ içinde Ukraina devletine Meclis ve qırımtatarlar halqınıñ aqlarını diqqatlıca qorçalamağa imkân doğuracaq Avrupa mahkemesi insan aqlarına yönelgen ğayet ihtiyatlı çağıruvlar mevcut«, - dep qayd etti Logvinskiy.

Eger Rusiye halqara cemaatçılığınıñ çağıruvlarına qulaq asmasa, Ukraina yañı sanktsiyalar kirsetilmesine areket etecek, dep ilâve etti o.

Bunıñ arfesinde PACEdeki ukrain eyyetiniñ yolbaşçısı, Ukraina halq deputatı Vladimir Aryev özüniñ Facebook saifesinde, çeşit devlet ve siyasıy gruppalarğa mensüp 45 PACE azası Rusiyeden BMT Halqara mahkemesiniñ qırımtatar halq Meclisiniñ faaliyeti tiklenmesi ve Qırımda ukrain tilini taqip etmekni bitirmesinen bağlı tevsiyelerni yerine ketirilmesini talap etken deklaratsiyanı imzalağan ediler.

Aprelniñ 19-nda BMT Halqara mahkemesi işğal etilgen Qırım sakinlerini qorçalamaq maqsadınen Rusiyege qarşı muvaqqat tedbirlerniñ tatbiq etilmesi kerek olğanınen razı olğan edi.

Hususan, mahkeme Rusiyeni qırımtatar halqınıñ aqlarını bozmamağa ve yarımadada ukrain tilinde tasil aluvnı temin etmesine mecbur etken edi.

XS
SM
MD
LG