Link açıqlığı

Konstantinov Qırım işğali içün parlamentke teşekkür bildirdi


Kreml nezaretinde çaşışqan Qırım parlamentiniñ yolbaşçısı Vladimir Konstantinov, onıñ müessisesi yarımada işğal еtilgen vaqıtta esas vazifeni eda etkenini aytaraq, parlamentke minnetdarlığını bildire. Bunı Konstantinov «Sputnik v Krımu» radiosınıñ efirinde beyan etti.

Konstantinov: «Qırım parlamenti Qırımnı Rusiyege kirmesini temi etti, bizevimizge qayttıq. Bunı işbu alet sayesinde becerip oldıq. Onıñ içün bu bizlerge eki dane bayram kibidir. Parlamentarizm imkânlarını eñ yüksek seviyede qullana bildik. Qırım sakinleriniñ eñ büyük qazançı referendum oldı. Bu demokratiyanıñ nümünesidir ve bunıñ esasında kitaplar yazaraq, Ğarp siyasetçilerine derslik sıfatında qullandırtmaq mumkün», – dep ayta.

2014 senesi martnıñ 16-nda Qırım ve Aqyarda yarımadanıñ statusınen bağlıdünyada qabul etilmegen referendum keçirilüvi neticesinde Rusiye Qırımnı özüne qoşqanını ilân etti. Ukraina, Avropa birligi ve AQŞ bu rey berüvni tanımadı. Martnıñ 18-nde Rusiye prezidenti Vladimir Putin Qırım Rusiyege “qoşulğanı” aqqında ilân etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG