Link açıqlığı

Saatnıñ esas haberi

Qırımda kvartira ket-kete ucuzlay – ekspert


Numünelik fotoresim
Numünelik fotoresim

«Nedvijimost Sevastoplya» («Aqyarnıñ taşınmaz malları») adlı riyeltrlar Birliginiñ prezidenti Grigoriy Apresov Qırımda taşınmaz mallarnıñ «2014 senesi aqsız yerde yüksekke fırlağan» fiyatları ket-kete tüşüp başlağanını bildirmekte. Ekspert bu fikirni Qırım.Aqiqat Radiosı efirinde ifade etti.

«Fiyatlar pek tez ve aqsız yerde yükselgen edi, artıq ket-kete tüşüp başladı. Menimce olar pek tez tüşe demege sıra kelmey, elbette. Fiyatlar pek tez tüşmey, amma pek tez arta. Ortalama esapnen yılda 5% tüşmesi kibi bir tendentsiya mevcut. Bu nasıl devam eter, aceba? Şimdi ekseriyet, menimce, aqsız yerde köpürniñ qurulmasını beklep, qurulğanınen fiyatlar tekrar kökke fırlar dep belley. Amma bu, zanımca, pek yañlış», dep ayta o.

Rusiyeli domofond.ru saytınıñ araştırmasına binaen, Aqmescitteki bir közli kvartiranıñ ortalama fiyatı 2,4 mln. rubleni (38 biñ dollar), Aqyarda 3.1 mln.rubleni (50 biñ dollar), Yaltada 4,9 mln.rubleni (78 biñ dollar) teşkil etmekte. Ayrıca sayt 2014 senesi iyün ve 2016 oktyabr ayları arasındaki fiyat dinamikasını da köstermekte.

Ukraina işğal etilgen Qırımda berilgen vesiqalarnı tanımay. Ukrain riyeltorları taşınmaz mallarnıñ satışınen bağlı resmiy añlaşmalarnı Ukraina ana toprağında yapmaqnı tevsiye ete.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG