İstilâ altındaki Qırımda mayıs bayramlarında içtimaiy tertip temin etilmesi maqsadınen Kreml nezareti altında bulunğan 3 biñ nizam qorçalayıcı organlarnıñ hadimi, cemaat teşkilâtı ve Milliy gvardiya arbiyleri celp etilecek. Bu aqta Moskva nezareti altındaki Qırım baş-naziri İgor Mihayliçenko bildirmekte.
«Qırım Cumhuriyetiniñ MVDsi bayram tedbirleri keçirilgen vaqıtta ictimaiy tertip ve vatandaşlarnıñ havfsızlığını temin etmek, terroristik areket, ekstremistik ve ruhsetsiz narazılıq aktsiyalarını, içtimaiy nizamnı bozacaq kütleviy nizamsızlıqlarnıñ ögünü kesmek maqsadınen bir sıra fiiliy-profilaktika tedbirleri keçrmege qarar aldı«, - dep ikâye ete Mihayliçenko «RİA Qırım« içün.
Onıñ sözlerine köre, kütleviy tedbirler ötkerilecek yerlerniñ episi hususiy donatmalar qullanuv vastasınen patlayıcı tehnik hızmet hadimleri tarafından teşkerilmekte.
Daa evel, mayıs bayramlarına Yaltağa şeerni patrul etmek içün ilâve polis hadimleri ve kazak teşkilâtlarınıñ temsilcileri ketirilecegi aqqında haber etilgen edi.
29 arpel – 2 mayıs arasında Qırımda turistler içün kütleviy-medeniy, bilgi arttırıcı ve sportiv tedbirlerniñ keçirilmesi qararlaştırılğan edi. Turistik mevsimine azırlıq çerçivesinde «Mayskiyevkrımu« promo-saytı işke tüşürilip, içinde bayram programması ve Qırım musafirhaneleri teşkil etken turlar aqqında malümat yerleştirilgendir.
