Link açıqlığı

«Çonğar» noqtasında bir afta içinde Qırımdan esas Ukrainağa 30-dan ziyade insan kirsetilmedi – Devlet sıñır hızmeti


Qırım ile memuriy sıñırdaki «Çonğar» kontrol noqtası

Ukraina Devlet sıñır hızmetiniñ vekilleri aprelniñ 17-si 23-yu arasında «Çonğar» teşkerüv noqtasında Qırım ile memuriy sıñırnı 33 insanğa keçmege izin bermedi, olardan 22-sine Ukrainağa kirişi 3 yıl müddetinen yasaqlandı. Bunı Ukraina Devlet sıñır hızmetiniñ Berdânsk sıñır otrâdınıñ matbuat kâtibi Nelâ Dotsenko Qırım.Aqiqatqa bildirdi.

«Sıñırnı qaidelerni bozıp keçmege istegenlerniñ çoqusı – Özbekistan vatandaşlarıdır», – dedi o.

Bundan ğayrı, Qırımğa eki kere patronlarnı qanunsız alda alıp ketecek ediler, üç kere de – afyonnı.

Qırım 2014 senesiniñ başında Rusiye tarafından işğal etilgen soñ Ukrainanıñ ana qısmı ve yarımada arasında memuriy, lâkin asılında tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» kiriş-çıqış kontrol noqtaları çalışmaqta.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG