Link açıqlığı

Qırımda faalci Remzi Bekirovnıñ şikâyet arizasınıñ baqılması avuştırıldı


Kreml kontrol etken Qırım Yuqarı mahkemesi faalci Remzi Bekirovnıñ şikâyet arizasını mayısnıñ 3-nde baqacaqtır. Bunı qırımlı advokat Edem Semedlâyev aprelniñ 24-nde Qırım.Aqiqatqa bildirdi.

«Oturışnı mayısnıñ 3-ne saat 15:30-ğa avuştırdılar. Mahkeme Ekstremizmge qarşı küreş merkeziniñ hadimini şaat olaraq sorğuğa çekmege istey», – dep añlattı Semedlâyev.

Martnıñ 30-nda Qırımda faalci Remzi Bekirov tutıldı, onı içtimaiy ağlarda yasaqlanğan malümatnıñ tarqatmasında qabaatladılar.

Qırımlı advokat Edem Semedlâyevniñ bildirgenine köre, Bekirov Rusiye Memuriy cinayetleri kodeksiniñ 20.29 maddesi – ekstremist malümatlarını azırlav ve tarqatuv – boyunca qabaatlana.

Kreml kontrol etken Aqmescit rayon mahkemesi Remzi Bekirovnı üç künge apiske alğan edi.

İmaye vekilleri bu mahkeme qararını şikâyet etecegini bildirdi.

Qırım Rusiye kontroline keçken soñ yarımadada FSB jurnalist, faal, cemaat erbaplarını sorğuğa çeke, tintüvler keçire, qırımtatarlarnı yaqalay. Uquq qorçalayıcılar bunı «farqlı fikirler ile küreş» dep adlandıra.

Ukraina Tışqı işler nazirligi Ukraina vatandaşları işğal etilgen Qırımda taqip etilgenlerinden raatsız olğanını beyan etip, basqılarnı toqtatmapa çağırğan edi.

XS
SM
MD
LG