Link açıqlığı

Çiygoznıñ cezasını ev apsine deñiştirmege razı olmadılar – advokat


Qırım Yuqarı Şurası ögünde Ukraina topraq bütünligine qoltutuv mitingi, 2014 senesi fevralniñ 26-sı

Kreml kontrol etken Qırım Yuqarı mahkemesi aprelniñ 24-nde eki yıldan berli SİZOda tutılğan Qırımtatar Milliy Meclisiniñ reis muavini Ahtem Çiygoznıñ cezasını ev apsine deñiştirmege razı olmadı. İmaye tarafı mahkemeniñ bu qararını «tam bir ırqiy ayırım» dep adlandıra, dep bildirdi Facebooktaki video muracaatında Nikolay Polozov.

«İmayeniñ fikirince, Birleşken Milletlerniñ halqara mahkemesi çıqarğan qaarı «Çiygoz davası» ve «fevral 26 davasına» dos-doğru tesir etmekte. Mahkümler sırasında ancaq qırımtatarlar bar, lâkin bu vaqialarda farqlı millet vekilleri iştirak etkeni bellidir. Bu vaqialardan bir qaç kün ögüne halq göñüllilerini, Qırım samooboronasını teşkil etkenler qırımtatarı degiller, raqiplerni faal areket yapmağa çağırğanlar da olar degil. Bunı Sergey Aksenov reberiyetinde halq göñüllilerniñ temsilcileri yapqan edi», – dedi Polozov.

O, Birleşken Milletlerniñ Halqara mahkemesi Qırımdaki Rusiye akimiyetiniñ Çiygozğa nisbeten yapqanlarına qıymet kesecegine ümüt ete.

Advokat qayd etti ki, Meclis reisiniñ muavini eki yıl ve üç ay devamında apiste yata.

«Prokuratura ve mahkemeniñ Çiygoznı apiste tutmağa devam etmek içün cinaiy-protsessual kodekske uyacaq bir sebepleri yoq, tek bir qabaat ağırlığı. Bu davanıñ şahısları apiste degil, o, ise qaldı, maña köre, Rusiye akimiyetiniñ siyasiy bir maqsadı bar», – dep ayttı advokat.

İmaye tarafı Çiygoznıñ cezasını deñiştirmege muracaat etmege devam etecek, dep bildire advokat.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.


XS
SM
MD
LG