Link açıqlığı

Qırımda Birleşken milletler mahkemesiniñ Meclis qararını yerine ketirmeycekler – matbuat vastaları


Zaur Smirnov, arhiv fotoresimi

İşğal etilgen Qırımda Gaagadaki Birleşken milletlerniñ Halqara mahkemesi çıqarğan qararğa baqmadan, Qırımtatar Milliy Meclisiniñ yasağınen bağlı qararnı ğayrıdan baqmaycaqlar. Bunı jurnalistlerge Kreml kontrol etken Qırım ükümetiniñ milletlerara munasebetler ve sürgün olunğan vatandaşlarnıñ işleri komitetiniñ yolbaşçısı Zaur Smirnov bildirdi, dep haber ete RİA Novosti.

«Meclis ekstremist faaliyeti içün yasaqlandı, bu sebepen mahkeme qararı ğayrıdan baqılmaycaq. Keri adım atılmaycaq. Qırımlılarğa nisbeten duşmanlıq yapqan lider teşkilâtnıñ itibarını tüşürgen, tıştan yapılğan bir basqı sebebinden bizler bu teşkilâtnıñ faaliyetine izin bermeycekmiz», – dep ayttı Smirnov jurnalistlerge.

Onıñ aytqanına köre, qırımtatarlar işğal etilgen Qırımda menfaatlarını bildirmek ve qorçalamaq içün farqlı cemaat qurulışlarını meydanğa ketire bileler.

Rusiye prezidentiniñ matbuat kâtibi Dmitriy Peskov Rusiyede qırımtatar cemaat teşkilâtlar ekstremist bir faaliyet yapmasa ola bile, dep ayttı. O, Qırımtatar Milliy Meclisiniñ yasağı lâğu etilecegini açıq-aydın bildirmedi.

Keçken sene 2016 senesi aprel ayında Rusiye kontrol etken Qırım Yuqarı mahkemesi işğal altındaki yarımadada Qırımtatar Milliy Meclisiniñ faaliyetini yasaq etti. Dünya toplulığı Rusiye akimiyetiniñ areketlerine narazılıq bildirdi. Meclis imayesi Rusiye Yuqarı mahkemesine şikâyet etti, amma şikâyet arizası red etilip, Meclis faaliyeti yasaq etildi.

Aprelniñ 19-nda Birleşken Milletlerniñ Halqara mahkemesi işğal altındaki Qırımda Ukraina vatandaşlarınıñ aq-uquqlarını qorçalamaq içün «Ukraina Rusiyege qarşı» davası boyunca muvaqqat tedbirlerini kirsetmege razı oldı. Bunı aprel 19-da Gaagadaki açıq diñlevlerde mahkeme reisi Ronni Abraham bildirdi. Mahkeme ukrainlerniñ aq-uquqlarına ketirilgen zarar deliller bar olğanını tasdıqladı.

Böylece, mahkeme Rusiyeden Meclis faaliyetini yasaq etmek qararı ile qırımtatar halqınıñ menfaatlarını temsil etmesi mevzusında aq-uquqlarınıñ bozulmasını toqtatmağa ve işğal etilgen yarımadada ukrain tilinde tasil berilmesini temin etmekni talap etti.

Yanvar ayında Ukraina BM Halqara mahkemesinde Rusiyeni terrorizmge maddiy destek köstermesine qarşı Halqara añlaşma ve er türlü ırqiy ayırımnıñ yoq etilmesi boyunca Halqara añlaşmalarını bozğanında qabaatlap, oña qarşı dava açtırdı. Mart başında Birleşken Milletlerniñ Halqara mahkemesinde dava baqılmasınıñ birinci basamağı ile bağlı açıq diñlevler yekünlendi.

XS
SM
MD
LG