Link açıqlığı

QMC Prokuraturası arbiy cinayetlerni taqiq etüv tecribesini Gürcistandan alacaq


Qırım Muhtar Cumhuriyeti Prokuraturasınıñ temsilcileri ve işbu şubeniñ yolbaşçısı olğan Gündüz Mamedov arbiy cinayetlerni taqiq etüv tecribesini gürcistanlı zenaatdaşlarından almaq niyetindeler. Bu aqta arpelniñ 21-nde QMC Prokuraturasınıñ matbuat hızmeti haber bermekte.

Haber etilgenine kore, ukrainalı prokurorlar Gürcistan Baş prokuraturasını ziyaret eterek, Halqara cinaiy mahkemesinen işbirligi yapmaqnen bağlı ameliy meselelerni muzakere etken.

«Qırım Muhtar Cumhuriyeti Prokuraturası öz işinde gürcistanlı zenaatdaşlarınıñ musbet tecribesini ve vaqtınca işğal etilgen Qırım yarımadasında işlengen cinayetlerni taqiq etüvge farqlı yanaşuvnı tatbiq etecek», - dep qayd etti Gündüz Mamedov.

QMC Prokuraturasınıñ temsilcileri Gürcistan Baş prokuraturasınıñ temsilcilerinen arbiy cinayetlerni taqiq etiv hususiyetlerini muzakere eterek, taqiqçiler söz yürsetilgen kategoriyadaki cinayetlerni taqiq etüv esnasında yapqan esas hatalarına diqqat ayırdılar, dep qayd ete matbuat hızmeti.

Arbiy cinayetler taqiq etilgende isbatlılıq bazasını temin etüv menbaları hususına ve Halqara cinaiy mahkemege yapılğan muracaatlardan alınğan neticelerge daa ziyade diqqat ayırıldı, dep haber etilmekte.

XS
SM
MD
LG