Link açıqlığı

Rosturizm Qırımğa 50-den ziyade subsidiyalı uçaq seferi açacağına işandıra


«Rusiye turizm federal agentligi» (Rosturizm) 2017 senesi Qırım ile Rusiyeniñ diger qomşu regionları arasında 50-den ziyade subsidiyalı uçaq seferi başlatacağına işandıra. Bu aqta aprelniñ 21-nde Yaltada keçirilgen iqtisadiy forumda Rosturizm yolbaşçısınıñ yardımcısı Aleksey Konyuşkov söz yürsetti, dep bildire Kreml nezareti altındaki şeer memuriyetiniñ matbuat hızmeti.

«Ustalıqnen çizelmesi kerek olğan bir çoq mesele mevcut olğanına baqmadan, bizler yarımadanıñ turizm saasında musbet inkişaf közetmek mumkün olğanını köremiz. Böyleliknen, naqliyat sıñırlavlarınıñ yoq etilmesi meselesine kelgende, bu yıldan başlap Qırım ve diger regionlar arasında (qomşu Rusiye - QA) uçaq seferleriniñ coğrafyası arttırılaraq, 50-den ziyade yañı subsidiyalı sefer peyda olacağını qayd etmelidir», - dep ayttı Konyuşkov.

Bunıñ arfesinde işğal etilgen Qırımğa yapılğan uçaq seferleri içün QMC Prokuraturası rusiyeli uçaq kompaniyasından 10 mln. grivna ceza talabınen dava arizası bergeni aqqında haber berilgen edi.

Yarımada 2014 senesi mart ayında Rusiye tarafından işğal etilgen soñ Ukraina ukümeti tarafından Qırım uçaq limanları qapatılmasınen bağlı qarar qabul etilgen edi. Anda ve andan yapılğan uçaq seferleri Ukraina qanunlarınen halqara qaydelerniñ bozulmasıdır dep esaplanmaqtadır ki, işbu uçaq şirketlerine nisbeten Ukraina ve Halqara vatandaşlıq aviatsiayası teşkilâtı (İKAO) tarafından halqara sanktsiyalar uyğulanması mumkündir.

Şimdiki künde Qırımğa yalıñız rusiyeli uçaq şirketleriniñ uçaqları uçmaqtadır.

XS
SM
MD
LG