Link açıqlığı

Qırımda Cuma-Caminiñ negizi qoyulmağa başlağanını bildireler


Aqmescitte Cuma-Cami binası negiziniñ temeli tantanalı sürette qoyuldı. Bunı «RİA Novosti Krım» Qırım haber agentligi aprelniñ 22-nde bildire.

«Şimdi esas binanıñ – cami binasınıñ – negizi qoyula – 1,9 biñ metr küp bu binanıñ negizi olacaq. Bina 2,6 biñ insannı sığdıracaq, içki azbarında 800 insan sığa bilecek – bayram künleri daa da ziyade adam ola», – dep ayttı «İndustriya razvitiya» şirketiniñ müdiri Enver Emiraciyev.

Kreml kontrol etken Qırım yolbaşçısı Sergey Aksenovnıñ qayd etkenine köre, Cuma-Caminiñ qurucılığı bütün qırımlı musulmanlar içün büyük emiyet taşımaqtadır.

«Bu yer Aqmescit ve Qırımnı yaraştıacaq. Mence, Qırım musulmanları içün büyük bir vaqia oldı», – dedi Aksenov.

Cuma Caminiñ qurucılığı 2015 senesi sentâbr 25 künü başlağan edi. O, Aqmescit suv anbarı civarında, şeerniñ cenübiy töpesinde qurula. Leyhağa köre, onıñ eki qısmı olacaq: 28 metr yükseklikte qubbe ile esas bina (37-ge 37 metr büyükliginde) ve iç azbarında sutun sırası ve şadırvan olacaq. Caminiñ dört minaresi olacaq, er biri 50 metrdir.

QAMDİ 2014 senesi Qırım Rusiye tarafından işğal etilgen soñ yapacaq areketlerini Meclis ile muzakere etmey. Yanvar 16-17 künleri Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı. 2016 senesi noyabr 19-da 14 qırımtatar din cemiyeti Kyivde toplaşıp, müftiylikni qurdılar. Müfti Ayder Rustamov oldı, o, Kyivdeki qırımtatar cemiyeti yanında Musulmanlarnıñ diniy qıymetleri komitetiniñ yolbaşçısı ola. Alimler şurası da quruldı, onıñ yolbaşçısı olaraq Ukraina musulmanları birliginiñ reisi Suleyman Hayrullayev saylandı.

XS
SM
MD
LG