Link açıqlığı

Saatnıñ esas haberi

Yaltalı Cepparovğa SİZOda tibbiy yardım kösterilmegeni azap olaraq sayıla bile – advokat


Aqmescit SİZOsında yatqan Yaltalı «Hizb ut-Tahrir davasınıñ» mabüsi Arsen Cepparov acele ameliyatqa muhtac. SİZO memuriyeti oña kerekli tibbiy yardım köstermey. Bunı Kreml kontrol etken Qırım Yuqarı mahkemesiniñ oturışından soñ aprelniñ 20-de advokat Cemil Temişev bildirdi.

«Al-azırda Arsen Cepparov ağır alda buluna. Boynunda svişç bar edi, şimdi qızardı. Sol qulağı eşitmey. Aqmescit şeeriniñ SİZO memuriyetine bir qaç kere muracaat etip, ameliyat yapmalarını talap etken edik. Şimdige qadar bir şey yapılmadı... Ayat telükesi bar. Yardım kösterilmegeni tek basqı olaraq degil, tam bir azap olaraq tanıyım», – dedi Temişev

Advokat SİZO memuriyetini prokuraturağa şikâyet etecegini, Cepparovğa tibbiy yardım kösterilmegeninden de mahkemede şikâyet etecegini bildirdi.

Kreml kontrol etken Qırım Yuqarı mahkemesi aprelniñ 20-de Yaltalı «Hizb ut-Tahrir davasınıñ» mabüsi Cepparovnı apiste qaldırdı.

Yaltalı «Hizb ut-Tahrir davasınıñ» mabüsleri Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste yatalar. Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Sirük tutulğan edi.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG